પ્રમુખ સ્થાનેથી...

   શ્રી કચ્છ ગુર્જર ક્ષત્રિય સમાજ મહાસભાની આગામી અર્ધવાર્ષિક બેઠક અને સગપણ સંમેલનનું આયોજન ગુજરાત પ્રાદેશિક સમિતિ અંતર્ગત આવતા દેવભુમિ દ્વારકા મધ્યે તા. ૬ અને ૭ જુન-૨૦૨૬ના બે દિવસ દરમ્યાન આયોજીત કરવાનું નક્કી કરવામાં આવેલ છે. ગુજરાત પ્રાદેશિક સમિતિના હોદ્દેદારશ્રીઓ અને ઓખા મંડળ ટ્રસ્ટની અદમ્ય ઇચ્છા અને ભગવાન દ્વારિકાધીશની પાવન ભૂમિ પર યોજાઇ રહેલ અર્ધવાર્ષિક બેઠકમાં વધુમાં વધુ કાર્યવાહક સભ્યશ્રીઓ ઉપસ્થિત રહે તેવી વિનંતી કરું છું. સાથે સાથે સગપણ સમસ્યાના હલ માટે પરણવાલાયક કુમાર-કુમારીકાઓ તેમજ તેમના માતા-પિતા જરૂરથી આ સત્તાનમાં ભાગ લઇ આપના બાળકોને પુરતી પસંદગી મળી રહે અને તેમનું સુખમય જીવન વધુ ઉન્નત બને તેવા પ્રયત્નો કરવા આહવાન કરું છું.

   સગપણ સમસ્યા તેમજ પાત્રોની પસંદગી માટે સામાજીક સ્તરે થઇ રહેલ પ્રયત્નોમાં કચ્છ પ્રાદેશિકની ટીમ ખુબજ સારી રીતે પરિણાલક્ષી કાર્યક્રમ કરી રહી છે. ગઈ તા. ૩૦-૦૧-૨૦૨૬ના ગોવર્ધન પર્વત - સતાપર મધ્યે એક સમિતિ ની ઘોષણા કરી ૨૦ ઘટકમાં લગભગ ૪૫ મેન્ટર ભાઈ-બહેનોની નિમણુંક કરવામાં આવી હતી.

   તા. ૧૬-૦૨-૨૦૨૬ના રોજ કુકમા મધ્યે મેન્ટરશ્રીઓની એક દિવસીય કાર્ય શાળાનું આયોજન પણ ખુબજ સફળતાપુર્વક કરવામાં આવ્યું હતું. દરેક ઘટકોના મેન્ટરશ્રીઓ પ્રારંભીક તબક્કામાં પોતાના ઘટકના સગપડાલાયક પાત્રોના ડેટા તૈયાર કરી તેને ઉંમર, અભ્યાસ, આર્થિક સદ્ધરતા, પાત્રની પસંદગી જેવા અલગ-અલગ કેટેગરીમાં વિભાજીત કરી પુરી પ્રાદેશિકની માહિતિ એકત્ર કરવા અને લીસ્ટેડ કરવામાં આવશે. આ માહિતિને આધારે દરેક ઘટકના મેન્ટરશ્રીઓ તેનો અભ્યાસ કરી પોતાના ઘટકના પાત્રોને અનુરૂપ પાત્રનું લીસ્ટ બનાવી પાત્રોના મા-બાપનો તેમજ અનુરૂપ પાત્રના મેન્ટરશ્રીનો સંપર્ક કરી પ્રબળ માધ્યમ બની રહેશે અને અસર-પરસના સંપર્ક દ્વારા આ સમસ્યા બની શકે તેટલી હદે ઉકેલવા પ્રયત્ન કરશે.

   મિત્રો, મહાસભાની દરેક પ્રાદેશિક સમિતિઓ માટે આ એક પાયલોટ પ્રોજેક્ટ બની રહેશે આપણે કેટલા સફળ થઇશું એ તો સમય જ બતાવશે. પરંતુ પરિણામને બાજુ પર મુકી સામાજીક કાર્યકર્તા તરીકેનું આપણું કર્મ સારી રીતે કરશું તો પરિણામ તો આપણા બધાના હૃદયમાં બીરાજમાન પ્રભુ શ્રીરામ આપણને સફળતા અપાવશે જ તેમાં કોઈ શંકાને સ્થાન નથી. અપેક્ષા રહિત કર્મ જ મનુષ્યને ઉન્નત બનાવવામાં મુખ્ય ભાગ ભજવે છે અને પરમકૃપાળુ પરમાત્મા સફળતા અપાવશે તે પણ નિશ્ચિત છે. માટે દરેકે દરેક પ્રાદેશિકના સગપણલાયક પાત્રોના ડેટા બધાને મળી રહે તેવા પ્રયત્નો કરવા પ્રાદેશિક સમિતિઓના દરેક હોદ્દેદારશ્રીઓને આહવાન કરૂં છું.

   સાથે સાથે ઘટક પ્રમુખશ્રીઓ અને તેની બંને પાંખોના હોદ્દેદારશ્રીઓ અને કાર્યકર્તાઓ પોતાના ઘટકના સગપણલાયક પાત્રોના ડેટા એકઠા કરવa માટે પ્રાદેશિક સમિતિને મદદરૂપ થાય. આમ સૌના સહિયારા પ્રયાસોના ફળ સ્વરૂપ આ સમસ્યાને હલ કરવા સૌના સાથ વડે ભગવાન આપ સૌને સફળતા અપાવે તેવી શુભેચ્છા વ્યક્ત કરૂં છું.

જય સમાજ . . .